Əmək və Əhalinin Sosial Müdafiəsi Nazirliyi işəgötürənlərə müraciət edib. ANS PRESS-in məlumatına görə, müraciətdə deyilir ki, Əmək Məcəlləsinə əsasən, havanın temperaturu +41 dərəcə selsidən çox olan hava şəraitində açıq havada və sərinləşdirici qurğular olmayan örtülü binalarda, otaqlarda və digər iş yerlərində bütün növ işlərin görülməsi dayandırılmalıdır. İşçilərə sərinləşmək üçün imkan yaradılmaqla fasilələr verilməlidir.

Bununla əlaqədar, Azərbaycan Respublikası Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti (DƏMX) mülkiyyət formasından asılı olmayaraq bütün işəgötürənləri xəbərdarlıq edərək, onlardan qanunvericiliyin tələblərinin yerinə yetirilməsini tələb edir.

Məlumat üçün bildiririk ki, DƏMX tərəfindən işəgötürənlərdə əmək qanunvericiliyinin qeyd olunan tələbinə əməl edilməsinə dövlət nəzarətinin həyata keçirilməsi tədbirləri bu müddətdə gücləndiriləcəkdir.

Qanunvericiliyin bu tələbinə əməl olunmamasına görə işəgötürənlər Azərbaycan Respublikasının İnzibati Xətalar Məcəlləsinə əsasən məsuliyyətə cəlb edilə bilərlər. Belə ki, Məcəllədə işəgötürən tərəfindən işçilərin iş yerlərində sağlam və təhlükəsiz əməyin mühafizəsi şəraiti ilə təmin edilməməsinə görə müvafiq məbləğlərdə cərimələrin tətbiq olunması nəzərdə tutulur.

Xatırladaq ki, son bir neçə gündə ölkə ərazisində anomal istilər müşahidə edilir. Havanın temperaturu bəzi yerlərdə 43 dərəcəni belə ötüb. Ümumiyyətlə avqust ayında ölkə ərazisində havanın temperaturunun normadan yüksək olacağı gözlənilir.

LEAVE A REPLY

Please enter your comment!
Please enter your name here